على راحتي

حاجات 1

2010-09-15T12:40:00.000+03:00

كعادته .. راح المنبه الصغير الذي لا يتجاوز حجمه الكف يرقص ويتمايل ويغني ويعلو صوته في طرب .. كان يتوقع ضربة خفيفة على راسه لتسكته لكن لا شيء حدث .. راح صوته يعلو .. ويعلو .. وكأن الضربة لن تأتي ابدا .. اخذت نغماته تعلو وتعلو وأحس بفرح عارم لهذه الراحة التي يحس بها حينما يغني ويرقص .. ولكنه احس كان سيارة مسرعة صدمته .. ها هو يطير في الهواء وينزل على الارض .. خرست الانغام في حلقه الصغير وغاب عن الوعي بمجرد أن لامس الارض .

امتدت يد الى هذا الصغير ورفعته من الارض .. وراحت تبحث عن اسطوانتين بجانبة .. حين التقطتهما ووضعتهما فيه .. فتح الصغير عينيه وهو غير مصدق انه حي .. أخذ يتكتك من الفرحة .. أحس بيد تعبث في ظهره .. احس انه لا يتنفس لفتره ولكنه مالبث ان انتهى الرجل من ضبطه فعاد يتنفس مرة اخرى .. وضعته هذه اليد بقوة على الكومود المجاور للسرير .

أخذ المنبه الصغير يتطلع للغرفة من حوله .. نظر الى الصورة التي بجواره .. ابتسم .. لكن الشخص الموجود في الصورة لم يبتسم .. نظر بعيدا ثم اعاد النظر في الصورة مرة اخرى .. لكن الوجة لم يتغير .. كان الوجه ساكنا ليس به اي تعبير .. لم يكن هذا الشخص ودودا .. فهو لم يبتسم حتى مع ابتسام المنبه الصغير له .

كانت هذه هي المرة الاولى التي يرى فيها المنبه بقية الغرفة لان الرجل الذي اشتراه وضعه مواجها للحائط .. كان لون الحائط جميلا لكن المنبه كان سعيدا لانه سيترك النظر الى هذا الحائط السخيف وينظر في البراح من حوله .. كان يقلب عينيه في الغرفة فوجد بجوار الصورة علبة سجائر مستوردة .. بئس الاختيار .. ليس لانها مستوردة بالطبع .. لكن أولم يجد هذا الرجل لحياته اهمية لدرجة انه اراد الانتحار؟ ولكن الم يجد طريقة افضل من هذه الطريقة؟ بئس الطريقة .. يبدو ان هذا الرجل لم يسمع عن طرق اكثر نجاحا للانتحار .

كانت الغرفة نظيفة .. مرتبة .. أنيقة ..

- جميــــــــــــــــــل .. هذا هو المهم .. الشخص النظيف حياته جميلة ...

لم يكمل جملته فقد راى صورة على الحائط لمرأة ساحرة الجمال .. وأحس هذا المنبه المراهق بغصة في حلقه عندما دخل الرجل الغرفة مرة أخرى .. لكنه هذه المرة أحسن حالا .. انه مبتسم .. ربما سمع صوتها الملائكي .. او قرأ من روحها رسالة له .. نظر الرجل للمنبه .. حاول المنبه التراجع عن افكاره خوفا من هذا الرجل .. ربما لا يحب ان يتناول أحد حياته الشخصية .. ليكن .. لكن الرجل اقترب من المنبه اكثر واكثر ..

- كلا أرجوك .. لا اريد أن اقف مرة أخرى .. الموت أرحم

أمسك الرجل بالمنبه وقربه إاليه .. شعر المنبه بنبضه يتسارع .. ولم يعد يسيطر على عقاربه .. وهنا وضعه الرجل في مكانه

- الحمد لله .. كدت أقتل

لكن لماذا يتصرف هذا الرجل بهذه الطريقة .. وعندما بدأ الرجل بارتداء ملابسه أغمض المنبه عينيه .. فالنظر لاجساد الاخرين حرام .. اللهم اغفر لنا ذنوبنا يا رب وهنا صاح الرجل:

- يااااااااا رب

تلفت المنبه حوله وشعر ان هذا البيت مسكون ..

- سلام قولا من رب رحيم

ارتطم قدم الرجل بالكومود فوقع المنبه على علبة السجائر

- لا .. لا .. لا أريد أن أموت .. ابتعد عني .. أنت شيطان .. تريدني أن أدخن مثلك .. لا .. لا أريد أن أغضب الله .. ضعني كما كنت لو سمحت

وعندما انتبه الرجل لما صنع امتدت يده وعدلت من وضع المنبه

- شكرا

- العفو

اتسعت عينا المنبه .. هل يسمعني هذا الرجل؟؟ نظر اليه مطولا وغاب عن الوعي .. مالت الصورة على المنبه لتوقظه

- استيقظ

فتح المنبه عيناه مرة أخرى فوجد الصورة متكأه عليه

- ما هذا؟ ابتعدي عني

- في ايه مالك .. اهدى .. لو وقفت هيرميك .. اصحي ومتسرحش تاني ولا تنام

وعندما نظر الرجل للمنبه لمعرفة الوقت وجد الصورة ملقاه عليه

- هو في ايه النهارده

ذهب وعدل الصورة

- العفو يا ستي أي خدمة .. بس خدي بالك والنبي المرة الجاية

نظر المنبه للرجل باستغراب .. وقال في نفسه ان الرجل مؤكد مجنون .. وهنا اخذ الرجل يغني

- مجنون .. وجناني ده عين العقل .. العقل ده داء بيعيي

نظرت الصورة للمنبه وقالت له

- انت مركز مع البني ادمين ليه؟

- هو كل حاجه هنا بتتكلم؟

- استنا بس اما يمشي الحمار ده

- بس حرام متشتميش .. هو ممكن يكون حمار .. مجنون .. اي حاجة بس احنا مش صح نقول كده

- حرام ؟ حرام ايه يا اهبل؟ حرام عليهم مش علينا

- على فكرة التعامل معاكي هيبقى صعب

- صعب جدا على فكره !!

قالت له هذا واخرجت له لسانها تغيظه

- وده كمان حرام .. انك تعيبي عليا حرام .. انتي ايه اهلك ماكنوش واخدين بالهم منك ولا ايه؟

- انت عبيط يا بني .. انا مليش اب ولا ام انا كده

- لا .. لا .. بس مفيش كلام .. انا مش ممكن اقعد جمبك على طول على فكرة

- في داهية

نظرت الصورة بعيدا عن المنبه .. لم يكن المنبه معتادا على هذا الوضع ولكنه يريد أن يعرف اين هو .

حتى تتأكد من وجودها

2010-09-15T02:16:00.002+03:00

الضوضاء تنتشر في الأوتوبيس المكيف المكتظ بالناس بداخله .. المصريون لا يعرفون كيف يتصرفون في مثل هذه الاماكن .. أحد الأشخاص اصطحب اولاده وزوجته وكانا يجلسان في كرسيين متجاورين .. وحين صعدت الى الاتوبيس نظرت في تذكرتي واليه فوجدت الكرسي الذي يجلس عليه لي .. وضعت حقيبتي الصغيرة فوق الرفوف وقلت: اذا سمحت .. لم ينظر الي فاكملت: الكرسي ده بتاعي .. وضع الطفل الذي كان على رجله على رجل امه واستدار .. حين نظر الي شعرت بانه يقيم الموقف .. لم يكلمني بل استدار وقال لزوجته: قومي .. قومي .. اقعدي في الكرسي ده .. أشار الى الكرسي المقابل .. من المؤكد انه يلعن نفسه وزوجته واهله اجمعين وانا بالطبع .. فانا من ايقظ شعور العجز بداخله .. هذا الشعور الذي بات متوطنا في كثير من الناس للاسف ..

شيء صعب أن اتخيل نفسي في مثل موقف هذا الرجل البائس .. لكني تذكرت انك لابد أن تتاكد اولا من وجود المشكلة حتى تفكر فيها .. هذا ما قلته متفلسفا للرجل الذي جلس بجواري بعد قيام الزوجين السعيدين حين حذرني من قول الصدق لموظفي الامن في الكمين على طريق الغردقة .. كأن اقول مثلا لا قدر الله ان هذه هي المرة الاولى لي التي اذهب فيها للغردقة .. قلت له وكاني فيلسوف اغريقي: شوف يا حاج .. اي مشكلة كده بالصلا ع النبي لازم منفكرش فيها الا لو اتاكدنا انها موجوده اصلا .. يعني حتى تتاكد من وجودها .. يا سلام ايه ده بس ايه الفصاحة دي .. نظر الي الرجل باستغراب وتمتم بصوت غير مسموع واراح راسه على الكرسي لينام ..

لعنت الفلسفة والفلاسفة والاغريق وكل الاجناس حين شعرت برجفة تجتاحني حين صعد مسئول الامن في نقطة التفتيش التي تسبق الغردقة .. رجل متوسط البنية يتطلع في الركاب وكانهم قطيع من الاغنام غير مرغوب فيهم .. كاد قلبي ينخلع حين كلمني: بطاقتك .. يا لهوي رحنا في داهية .. لم يكن يفصلني عن الاعتراف بمكان البضاعة الا صوته هو حين كلم غيري .. حاولت جاهدا رسم نظرة الواثق على وجهي ومددت يدي بالبطاقة وانا اقول: ريسيبشن قرية ... نظر الرجل الي مرة اخرى وقال: انزل .. ليه بس يا امير .. ماحنا كنا كويسين .. نزلت وكل احتمالات السوء تدور براسي .. نفضت عن راسي فكرة قضاء الليلة مع هؤلاء .. لا .. لا يمكن .. فهم ليس لديهم مكان معد لاستقبال امثالي .. مكان؟! .. انت تحلم اذا .. لا .. ان شاء الله لن يحدث مكروه .. يااااارب .. قطع صوت رجل الامن وصلة الدعاء والشحتفة وقال: تعالى .. الشنطة وكل مابها اصبح امام هذا الرجل .. لم اجرؤ على قول اي شيء .. نظر الي وقال: ايه ده؟؟؟ .. ده؟؟ ده مفك .. مفك .. اه .. يا رب استر .. ده مفك .. اه ده صيني .. والله لو اعرف كنت اشتريته مصري .. بس هي مصر تشد حيلها شوية .. تركني وقام .. ايقنت ساعتها ان تشجيعي للصين سوف يجلب لي المصائب .. الله يحرق الصين واللي جابو الصين .. ولكن صوت الموظف اعادني مرة اخرى للموقف: محمد .. ايوة يا فندم .. خد بطاقتك وشنطتك واركب ..
معقول .. بالسهولة دي سابوني .. انا المجرم اللي اشترى مفك صيني يسيبوني .. ايه ده بس .. حين صعدت للاتوبيس تذكرت عجز الرجل الذي ترك الكرسي وحسدته .. وما ان جلست حتى نظر الي الرجل بجواري وقال: ايه اللي حصل .. لم اتمالك نفسي من الضحك وقلت: انا مش قلتلك يا عم الحاج .. اي مشكلة لازم منفكرش فيها حتى نتاكد من وجودها اصلا ..

الواجب

2010-09-14T00:40:00.002+03:00

اصطفت كراسي ودكك بجوار بعضها البعض .. بعض هذه الكراسي ابتلي بأشخاص حضروا مبكرا .. اصوات الناس تعلو وتنخفض .. رجال يزرعون الشارع جيئة وذهابا

جلس صاحبنا على واحد من تلك الكراسي .. كراسي مصنوعة من الألومونيوم ومكسوة بطبقة من القطيفة .. انتشرت هذه الكراسي مؤخرا في المناسبات

لم تكن تروقه هذه النوعية من الكراسي .. فهي تعوقه عن الجلوس المريح .. فهي صغيرة مقارنة بحجمه

فكر في التخلص من هذا الكرسي والقيام بحركة لا يعرف عواقبها إلا الله .. هم بالوقوف لكي يجلس على الدكة الواسعة التي تناديه أو هكذا تخيل .. لكنه لم يتحرك من مكانه .. فلقد جاء رجل قصير وأجلس أحد الناس في هذا المكان .. كان هو نفسه الرجل الذي قاد صاحبنا الى هذا الكرسي اللعين

أصبح الكرسي الصغير يمثل عبئا على صاحبنا .. أخذ يتململ مرة إلى اليمين ومرة إلى اليسار .. كان يتخيل أن وزنه سيكون له تأثير بشع في حالته .. وأنه حين يقف سيكون شكل الكرسي مطبوعا على مؤخرته

كاد يلعن اليوم الذي طلب منه أبوه الذهاب لاداء واجب العزاء .. لكن معاناته لم تطل فلقد صاح رجل تعلو صوته مسحة من الحزن قائلا: تفضلو يا خوانا

انتزع صاحبنا نفسه من الكرسي انتزاعا .. أحس بارتياح شديد .. أخيرا اراح نفسه من هذا الهم الثقيل .. امتدت يده بعفوية تعدل من وضع جلبابه على مؤخرته

تحرك صاحبنا مع الجمع .. وصلو للمسجد الذي سيصلون فيه صلاة الجنازة .. دخل بعض الناس لاداء الصلاة لكن صاحبنا ظل واقفا خارج المسجد .. لم يدخل ليس لانه لا يحب الصلاة لكن ربما كان السبب هو ذاك الموقف الذي تعرض له صغيرا

ذهب مرة الى المسجد في احد ايام اغسطس الحارقة وبعد انتهاء الصلاة لم يجد الشبشب البسيط الذي كان ينتعله ولم يكن تعلم وقتها ان الناس لن تبالي اذا اخذ شبشبا من المسجد ويقوم باعادته فيما بعد كان يحس انه يسرق لذا اثر الرجوع الى منزلهم البعيد حافي القدمين

كان يحاول التغلب على هذا الموقف ولكن كلما هم بالدخول يحس باحتراق في قدميه

حين خرج الجمع من المسجد استأنف المسير مرة أخرى ولم يكن صاحبنا يدري ماذا سيحدث بعد ذلك فلقد كانت هذه هي المرة الأولى التي يحضر فيها واجب

في البعد لاحت سيارة نقل كبيرة .. بجوارها بعض سيارات البيجو والميكروباص .. ادرك ساعتها لماذا اعطاه ابوه جنيها حين قال له اذهب .. بدأ يتخطى الناس برشاقة عجيبة .. ربما كان مصدر هذه الرشاقة غير العادية هو خوفه من تكرار مأساة الكرسي القطيفة .. ربما كان أيضا خوفه من الحشر بين ثلاثة ركاب في واحد من المقاعد الخلفية .. رغم أن القوانين تفرض أن يكون في المقاعد الخلفية ثلاثة ركاب فقط إلا أن جشع السائقين واستغلالهم حاجة الناس يجعلهم يفرضون وجود أربعة في المقعد الخلفي .. ولحسن حظ صاحبنا جلس بجوار السائق على كرسي واسع مريح وعلى يمينه الباب .. نظر صاحبنا في مراة السائق فوجد المقاعد الخلفية لا تعاني .. العدد مطابق للمواصفات .. أقصد القوانين .. تعجب صاحبنا من السائق .. فحدق رغما عنه في وجه هذا الغريب .. لاحظ السائق أن صاحبنا اطال النظر اليه فقال: في حاجة يا استاذ .. تلعثم صاحبنا واحمرت وجنتاه وقال: ايه؟ لا لا ابدا .. سلامتك .. انا بس بتفرج ع الترعة اللي على شمالك .. عادي يعني

صمت السائق وركز في الطريق .. لكن صاحبنا لم يتمكن من اخفاء دهشته من هذا السائق الغريب غير الجشع .. لم يستطع أن يسكت فساله: هو انت منين ياسطة؟ البلد يعني؟ رد السائق وهو مشغول بالطريق امامه: من زليتم .. عارفها؟ ابتسم صاحبنا وقال: طبعا طبعا .. أحسن ناس .. لم يرد عليه السائق فقد كان مشغولا بالمرور من السيارات التي امامه وكانه في سباق

كان السائق يحس أنه على اخره .. انه قنبله بيولوجية من الممكن ان تنفجر في اي وقت .. لذا كان يضغط على دواسة البنزين بشدة لانه يريد أن يصل سريعا ليتجنب انفجار القنبلة .. لم تعجب هذه السرعة بعض الركاب كبار السن .. وتحول عدم الاعجاب الى سخط بعد مطب كادت فيه رؤوس الناس ان تخرج من سقف الميكروباص فصاح أحدهم: ياااااااااااا عم انت عايزين نوصل وحياة أبوك .. كانت القنبلة على وشك الانفجار ولم يستطع السائق تحمل مثل هذه التعليقات المستفزة في نظره .. فأخذ يصيح: انتو هتتعبونا معاكم ليه؟ الواحد مزنوق من الصبح وعايز يتنيل يعمل زي الناس وطالما انتو مش عجباكم السرعة خليكم استنوني لما اجيلكم .. وترك السائق السيارة وتوغل داخل الارض الزراعية التي على جانب الطريق

كان الركاب مذهولون لم يكونو متوقعين ذلك وكسر الصمت أحد الاشخاص حين قال: هي حبكت!! وانفجر الركاب في الضحك

لم يكن صاحبنا متعجبا لكنه ضحك ايضا لكنه كان يضحك لسبب اخر .. كان يعتقد بالطبع قبل هذا الموقف أن السائق لا يشعر بما يشعر به البشر فهو مصمم لغرض واحد وهو القيادة .. القيادة فقط ولا شيء غير ذلك

لم يستطع صاحبنا منع نفسه من الضحك حين صعد السائق مرة اخرى للميكرباص .. نظر له السائق باستغراب لكنه لم يتكلم .. ادار الميكروباص وقاد في هدوء هذه المره

وصل الميكروباص الى المقابر وبدأ الركاب في النزول وما إن يبتعد احدهم حتى يكيل الشتائم للسائق وبلده .. الا صاحبنا فقد كان يحاول جاهدا ان يكتم ضحكته ويتحكم في جسده الذي بدا وكانه يرقص

وما ان بدأ اهل الميت في أخذ العزاء وشكر الناس على مشاركتهم حزنهم حتى أحس صاحبنا بالقنبله .. القنبلة التي لا يمكن ان تنفجر في وقت أسخف من هذا .. احمر وجه صاحبنا ولكن هذه المرة من الخجل .. ماذا يفعل .. بدأ ينسحب شيئا فشيئا حتى ابتعد واراد قضاء حاجته .. سار مسرعا الى جانب الطريق لكنه لمح السائق ينظر اليه .. استدار مبتعدا حتى وجد مكانا مناسبا

حين انتهى الناس من مراسم العزاء بدأو في ركوب الميكروباص مرة أخري .. وحين صعد صاحبنا الميكروباص وجد السائق ينظر اليه وعلى وجهه ابتسامة عريضة

نظر اليه صاحبنا وقال: مالك؟ لم يتمالك السائق نفسة من الضحك وقال له: ايه؟ لا لا ابدا .. سلامتك .. انا بس بتفرج ع الترعة اللي ... وسكت

دنيا من صنعك أنت

2010-09-12T07:32:00.000+03:00

افتح عيني

و أطرق باب الفجر

اتمنى يوما .. يخلو من حزن او غدر

افتح عيني

صورتك أمامي .. لا تبلى .. لا تتلاشى

تبتسم لاجلي .. بسمة بشر

ابتسمي أكثر في وجهي

فأحس بأني في دنيا

في دنيا من صنعك أنت

في دنيا يملؤها العطر

مستني إشارة

2010-09-05T10:16:00.003+02:00

قلبي في نبضك حياته . .
بيك يعيش كل الاماني . .
ولسلامتك يرمي روحه تحت اقدام الزمان.

يفدي راحتك باللي ليا . .
ولو مفيش تاخد عنيا . .
المهم تبقى راضي وتبقى حاسس بالامان.

يا حبيبي قلبي لو يقدر يقفلك . .
يحرسك من كل شر . .
يبعد اللي يريد يضرك واللي رايدلك هوان.

قلبي مستني اشاره . .
تيجي منك كالبشاره . .
قلبي يتحنى ويرقص وهو واقف ع البيبان.

يا سلام

2010-08-29T02:21:00.005+02:00

معقول؟؟؟ احنا بنستهبل. مش جديد. بس الجديد ان الناس اللي بنستهبل قصادها مش هبل. ايه رايكم؟؟؟؟؟ من غير مقدمات. اسرائيل. عارفينها؟؟؟ اها هي دي البلد اللي منكده علينا عشيتنا مش عشان هي حاجه لا عشان احنا ولايا. وحشة ولايا دي. اها طيب اقل يا سيدك. اسرائيل قررت انها تعلم طلبتها في 170 مدرسة في شمال اسرائيل عارفين هتعلمهم ايه؟؟؟؟؟؟؟ تصورو هتعلمهم عربي. عربي يا مؤمنين. عربي. مش بس كده. دي عاملاه مشروع وبتسوقه للعالم. لمين للي شايفينا ارهابين ومتعنتين وعايزين الحرب ومش عاجبنا العجب ولا الصيام في رجب. الكلام ده امتى؟ امتى؟ الكلام ده يتزامن مع مفاوضات مباشره مش هناخد منها لا حق ولا باطل. لاننا مش عارفين احنا عايزين ايه. هما يقولو واحنا نرفض. هما ظلمة والله مش عايزين يدونا ارضنا وجيش ونغلبهم كمان دورين شطرنج. بلا هبل.. المهم المشروع مسميا يا سلام يا سلام سلم كمان. وده عشان تبرز حرصها على نشر مفاهيم السلام مع العرب اللي لغتهم ايه ؟؟؟؟ صيني طبعا. عدد زي ده 170 مدرسة في شمال اسرائيل مشتركه في المشروع ده.. احنا بقى فين مشارعينا؟؟؟ في محاولاتنا للتاثير في العالم؟؟ حد يرد عليا يقولي انت مجنون اصلا هما كلهم متفقين. ماشي متفقين . اعمل اللي عليك يا اخي اظهرهم قدام نفسك قدام ربنا انهم هما اللي غلطانيين ومش بيقدرو مجهووووووداتك. الغريب يا مؤمن ان الناس معندهاش مشكلة. ولا انا عندي مشكلة بس الناس د مش بتهزر. الدفعات دي هتتعلمنا هتدرسنا وهتعرف تغلبنا بينا وتموتنا وتؤف تاخد العزا. ولا عزاء للسيدات

ملو روحي

2010-08-23T03:03:00.004+02:00

بتفكري انك بعدتي وتقدري تخفي مشاعرك . .
وانتي نسياني . . وناسية اني منك . .
وان نبضك ملو روحي . . واني عايش جوا دمك . .
واني بتنفس هواكي . . واني بشرب بس نبعك . .
متفكريش انك بعدتي وتقدري تخفي مشاعرك . .
لا فكري فيا وفكري اني بحبك . .
واوعي تنسي ان قلبي عند قلبك . .
وان ايامي وكياني كله ملكك . .
بتمنى انك ترحمي اسري واسرك . .
وتسمحي لروحي البريئة يوم تضمك . .
وتسمحيلي انا وانتي نعيش بقلبك . .
وتسيبيني استمتع بقربك رغم بعدك

من ورا عنيكي

2010-08-19T08:19:00.006+02:00

من ورا عنيكي تزغرت ضحكة حلوة جوة دمعك . .
ضحكة صوتها اعلى منك . . اعلى دايما م اللي هامك . .
ضحكة بتكسر دموعك . . ضحكة بتهد اللي هازمك . .
اضحكي . . اضحكي وانسي دموعك . .
مش هيبقى الا ربك . .
ربك العالم بحالك . .
اللي حاطط جوا قلبك صبر بيهد الجبال . .
واللي راسم فوق عنيكي قوة بتهز الرجال . .

قصة بدون عنوان

2010-07-31T04:47:00.004+03:00

أتعرف؟ لن تصدق أن الأطفال يظلون حتى هذه الساعة من الليل خارج منازلهم. ولكن في هذه الأحياء عادة نصدق. فالأطفال يلعبون ويصيحون ورجال الحي على المقهى يراعون أطفالهم وأطفال الجيران عامة وهم يتحدثون ويلعبون ويشاهدون مباريات الكرة. أما نساء الحي فهي في النوافذ وعلى الأسطح وفي البيوت كشغالات النحل. ويظل الكل هكذا حتى يتعب الأطفال فيقعدون ويتعب الكبار فيسكتون وتتعب النساء فتنام. أما شباب الحي فلا يأتي إلا بعد الثانية أو قرب الفجر.

التعليم

2010-05-06T06:01:00.002+03:00

بسم الله
التعليم وسنينه . .
بصراحة ومن غير ماندفن راسنا في الرمل . . الحل الوحيد للتعليم هو تقليل كثافة الفصول . . الحاجة التانية هي جعل الفصل بيئة مريحة للمدرس والطالب معا . . بمعني انه يكون في مروحة ولو أمكن مكتبة . . ترابيزة وكرسي للغلبان اللي هيشرح . . الفصل مايزيدش عن 15 . . الفصل يكون نظيف . . الموجهين يخفوا شوية لانهم بصراحة لا منهم ولا كفاية شرهم . . باختصار مش بيفهموا (الكلام ده على معظم الموجهين) يعني لا بيفيدوا المدرس ولا الطالب ولا بيفيدوا نفسهم . . هما بس عايزين يحسوا انهم لسه لهم لزمة . . للاسف ملهمش لزمة . . لازم يعترفوا بكدة والوزارة لازم تتعترف بان وظيفة الموجه دي نومة وراحة للناس اللي عايزة تنام . .

نفسك . . اذا لم تشغلها بالحق, شغلتك بالباطل

2010-04-13T00:08:00.000+02:00

نفسك و وقتك و عملك و ولدك و زوجك . . كل هؤلاء ان لم تشغلهم بالحق . . بالاشياء المفيدة المثمرة . . شغلوك بالباطل . . بالتيه . . بالظلم . . بالكبر
سارع الى ان تشغل نفسك بالحق و اترك الباطل لغيرك عسى ان تكون من المفلحين الفائزين
اللهم علمنا ما ينفعنا و انفعنا بما علمتنا

2010 الطاهرة

2010-02-26T07:36:00.004+02:00

بدون سبب واضح, اللهم الا انزعاج الناس من السنة الماضية 2009 , هب كل الناس يهللون للعام الجديد. و لا اعلم تحديدا من هؤلاء الذين يهللون؟ هل هم من الموظفين؟ ربما يعملون في القطاع الخاص؟ هل هم تجار؟ ام سياسيون؟ على حد علمي لا يجب علينا التهليل هكذا مهما كانت توجهاتنا و انتمائاتنا. لماذا؟ ذلك لاننا نمر بوقت صعب على كل مستوى. اجلس في بيتك.- اذا كان لديك بيت- أو على مقهى من المقاهي التي تزيد يوميا بشكل عجيب وفكر. لو انك ستمر باوقات سعيدة هذا العام. هل هي بسبب هذا العام الذي يقول الناس عنه انه سعيد. يجب علينا جميعا الا ننساق لمثل هذا التهليل و كأن السنة ستاتي بكل ما نريده. السنة يا سادة ستأتي بكل ما نعمل على تحقيقه - اذا عملنا.

المدونات

2008-06-27T19:24:00.003+03:00

العملية هاصت
كل الناس تعتقد ان هي بس اللي بتفهم
انا لا اعتقد اني اكثر واحد بيفهم
لكن
في ناس كتير بتفهم اكتر مني
الشاهد هنا هو ان الناس لازم تخف شوية
الناس اللي هما بيحسبوا عمار الدنيا دي على اديهم
ايوه لازم يخفوا شوية
يخفوا على الناس و يخفوا على الحكومة
ويبطلوا اشاعات
ويبطلوا نصب
المدونات دي اتعملت عشان الواحد يفضفض
الناس اكتشفت فيه مكان واسع جدا للقباحة و قلة الادب
الناس اكتشفت انهم ممكن يلعبوا سياسة و ان الناس الفاضية تسمعهم
السياسة دلوقتي انك تلاقي اكل و شرب و لبس و مسكن
غير كده روح صلي شوية
لاقي وقت اكتر بر والديك
تصدق
المهم اتصرف ابني مش ترغي
سلام

هو ربنا ظالم؟؟؟

2007-11-14T23:34:00.000+02:00

انا عن نفسي ماعتقدش . . بس الناس بتقول انه ربنا يعني بالعربي كده هيدخل اللي عايزه الجنه ويدخل اللي عايزه النار . . كده يعني . . شويه هنا و شويه هنا . . على اساس قبضة في الجنة و قبضة في النار . . انا ابويه مؤمن بكده . . بس انا مش مؤمن بكده
ربنا هيحاسب الناس و عشان ربنا كبير هيسامح في حقه اللي فرضه علينا و معملناهوش
انما اللي للعباد ربنا هيقتص منهم
بس في الآخر هيقبض قبضة واحدة من عفوه و ربنا اللي قال كده بعد شفاعة الناس و الانبياء و يطلعهم من النار و يدخلهم الجنه و يرضى عنهم
دول هم عتقاء الله
اللهم اجعلنا منهم
بس ان الناس تبقى متاكده انه ربنا كده ممكن يثدخلهم النار و هم موحدين و مؤمنين
لا
الكلام ده كلام فارغ
ودعوة للناس تكبر دماغها يعني بلا عباده بلا نيله يعني قمة الفوضى
احنا هانخلي الناس بالطريقة دي تبرطع في الذنوب على خلفية عبيطه
الخلفية دي هي خلفية قبضة في النار و قبضة في الجنة
حرااااام

كم من الدنيا يلزمك لتكون سعيد؟؟؟2

2007-11-13T05:14:00.000+02:00

التدوينة اللي فاتت كانت خدعة . . محدش عرف كم من الدنيا يكفي؟
الحقيقة مفيش كمية من الدنيا تكفي . . دي الحقيقة . . الدنيا لا تكفي
لا تكفي قلب متشوق للمعرفة . . لا تكفي قلب متطلع . . لا تكفي قلب حزين . . لا تكفي قلب فرح . . لا تكفي قلب جشع . . لا تكفي قلب طامح . . لا تكفي قلب رافض . . لا تكفي إلا قلب قانع و راض . . ليس لأنها تكفيه
بل هو يكتفي منها بما جاد الله سبحانه وتعالى
والله مهما أردت . . لن تشبع . . هي الحقيقة التي طالما سمعناها بآذاننا و ما سمعتها قلوبنا . . طالما أردنا . . والعين بصيرة و الأيد قصيرة . . وليه العذاب ده . . متقول الحمد لله . . حسها . . بقلبك يا بني آدم
طيب الرضا يعني نبطل شغل . . مين الحمار اللي بيفكر كده
و لما تبطل مين هايجيبلك تاكل و تلبس وتروح للدكتور و تجامل الناس في المناسبات و تزور قرايبك و قرايب مراتك و تصرف على الأولاد و التعليم و الشقة ألخ ألخ ألخ
محدش
يعني ممكن تقعد قدام الضمراني و تشحت
لا يا برنس لازم تحاسب . . انت هاتشتغل و هاتطلع عين اللي خلفوك . . بس اللي هايجي بعد كده هو رزقك
طيب الواحد يخلي باله مع الفلوس؟؟؟
لا يا معلم الفلوس دي لو حطيت بالك فيها هاتبقى بتعبدها
عبد الدرهم ؟ فاكر؟؟ انت هاتشتغل زي ماقلنا و ربنا سبحانه وتعالى هايرزقك . . يابني و الله هاتلاقي رزقك بيسابق علشان ييجي لحد عندك . . آمن
اللهم علمنا ما ينفعنا و انفعنا بما علمتنا
اللهم اني اعوذ بك من قول بلا عمل

كم من الدنيا يلزمك لتكون سعيد؟؟؟

2007-11-12T18:13:00.000+02:00

بكل صراحة السؤال ده محيرني جدا
اصل الواحد من ايام مكان عيل صغير و هو عايز عايز عايز
مفيش المرة الواحد قال الحمد لله بقلبه ابدا انما الكل بيقول الحمد لله بلسانه بس وده ان قالها اساسا
انا عايز ولاحظو لسه بقول عايز
لكن الواحد ملاحظ انه مش ممكن حدد يحدد هو عايز ايه بالضبط . . يعني ممكن تكون عايز تتعشى مثلا
وبعد العشاعايز اخلص شغل و بعد الشغل اتصل بخطيبتي و بعد الاتصال اتصل بواحد معرفة وبعد المعرفة انام وبعد ما انام
ووووووووووه
الواحد مش هايبطل طيب دا كله ليه؟؟؟؟
الله اعظم . . اصل سمعت الاذان بتاع العشا
المهم عايز اقول ان البني ادم اللي هو ابداع ربنا اصبح مسخ مش عارف هو عايز ايه وليه
مش عارف غير انه يعبد الاصنام اللي هو عملها
التلفزيون صنم كبير
السينما لا مش صنم
الكورة صنم كمان
طيب هو ايه الصنم
الصنم هاعرفّه على اساس التدوينه اللي فاتت . . بص تحت ولنت تعرف . . الله ثم المصلحة ثم الرغبة
الصنم بأه هو اللي ياخد كل حواسك وانت بتعمله هو ده الصنم
مثال . . أغنية لأم كلثوم . . ممكن تكون صنم و ممكن متكونش . . تبقى صنم لما تقعد وتسمعها لوحدك بدون هدف . . انما لو قعدت انت و الست بتاعتك . . تعمل جو في الخلفية . . هنا الأغنية مش صنم . . لو بتسمعها في الخلفية و انت بتكتب أو بتخلص شغل . . كسر للملل يعني تبقى مش صنم
احنا بنسيب ابواب للمتعة كبيرة و نرضى بابواب ضيقة بنخش فيها مزنقرين . . احنا مش اسوياء ابدا . . الثقافة اللي التاجر فيها هو الملك . . دي ثقافة خلق الزبون الحمار . . لا مؤاخة كلنا زباين
حد يقول الناس بتسترزق من بعض
بس اللي بيحصل مش رزق دا نهب
حد يرضى انه يتنهب . . اهو دا اللي حاصل
انا احب ابقى متدين بس محبش ابقى مخنوق . . اي حاجة بحس ان ربنا هيبقى راض عني لما اعملها .. هاعملها . . المهم انا مش عارف الناس متبته في الدنيا بالطريقة الغلط ليه . . الناس دي بهايم . . ممكن انا اكون واحد من الناس دي . . بس انا زهقت من الحاجات اللي مش بتمتعني
انا زهقت
انت مزهقتوش
اللهم اغفر لنا اسرافنا في امرنا

مدرس يا بيه! هههه

2007-11-08T06:13:00.000+02:00

امبارح انا كنت واقف في الفصل كده و لقيتني بقول كلام كبير شوية . . الكلام كان موجه لطلبة الصف الاول الإعدادي . . حلوة موجه دي؟ المهم انا كنت بقول ان الواحد لازم يكون شايف حياته على تلات مستويات . . الأول يا بيه هو علاقته بالله سبحانه و تعالى و الثاني هو مصلحته الشخصية و الثالث هو انه يمتع نفسه . . كده بالبساطة دي
ربنا و بعدين مصلحتي و بعدين رغباتي
كل مستوى يحكم اللي تحته
يعني مثلا مش ممكن اشوف مصلحتي في حاجة تغضب ربنا . . و مش ممكن البي رغبات تتعارض مع مصلحتي . . الكلام ده فلسفة؟؟ باين كده
المهم دا انا حاسس انه كلام جديد
الله المستعان

طلقات

2007-10-26T23:07:00.000+02:00

هذه ثالث تدوينة اليوم . . هو يوم استثنائي إذن . . قلت أني لن أكتب خواطر و سوف أكتب موضوعات
أعلن أني اتراجع . . فهي طلقات لا تسمح لأي مخلوق أن يحدد حريتها
وإلى من يعرف أني أفكر فيه دوما أقول . . أنا ثم أنا ثم أنا أعترف بأني جزء ثم جزء ثم جزء يسبح ثم يسبح ثم يسبح في بحر صنعته دموع ثم دموع ثم دموع تتدفق من شوق ثم شوق ثم شوق غلب قلبي وعيني . . أحبك

اصطناع التدين

2007-10-26T22:55:00.000+02:00

ليس أصعب على أحوال المجتمع من النفاق بمعناه الذي صار منتشرا في هذه الأيام . . لاحظت أخيرا أن الناس لم تعد تعبأ بالدين في أمور و تعلي قيمته في أمور أخرى . . تحت بند الإيمان ببعض الكتاب و الكفر ببعضه . . الناس بعد موت شخص مهم فيهم يقيمون ما يسمى عندنا " نصبه " نسبة إلى الفعل ينصب . . وقد يتبادر إلى الذهن مصطلحي النصب و الإحتيال . . و هذا من حق الناس . . يكون في هذا السرادق مقريء لقراءة القرآن . . قد يقول البعض . . وما في ذلك؟! هل أن يقام مجلس لقراءة القرآن اصطناعا للدين . . و يكمل بكلام من عينة " كفى عداء للمتدينين . . ألأنهم عند الله أفضل منكم تهاجمونهم . . " أقول لهؤلاء مهلا . . نحن لا نهاجم من أجل الهجوم . . ماذا تقولون في مقريء يترك صلاة الجماعة في المسجد و هي على بعد أمتار لا تتعدى الخمسين و يصلي وحده " هذا مع افتراض انه صلى بالفعل وأنا أشك في هذا" بل الادهى أن من يدافع عن مثل هذا المقريء لا يعلم أنه بدأ بتلاوة القرآن و الناس تصلي الركعة الثالثة في المسجد. . أن تكون لا تصلي فهي مشكلتك وحدك أما ألا تعير الناس أي اهتمام فهذا ما هو مرفوض . . اصطناع الدين هنا هو إعلاء الفرع على الأصل. . لا أريد أن أزيد
اللهم علمنا ما ينفعنا وانفعنا بما علمتنا و اجعلنا من عبادك المخلصين المخلصين
آمين

الله و أنا

2007-10-26T12:52:00.000+02:00

أشعر أن العلاقة بين الخالق عز و جل و العبد علاقة خاصة. ما معنى علاقة خاصة؟ هل هي التي يتخفى العبد فيها عن عيون الناس و لا يظهر منها شيء؟! ربما. قد يقول البعض أن العبد يجب عليه طاعة الخالق عز وجل في أمور ظاهرة لا تقبل الخفية و عدم الظهور . هذه بداية جيدة.
إذن ما هي الأشياء التي لا يمكن للعبد الإختباء و هو يؤديها؟! سؤال لنبدأ
أولا : يجب أن يصلي العبد الصلوات الخمس في المسجد
ثانيا : إذا قام العبد بالحج فلا يمكن أن يتخفى (حتى وإن أراد) , أليس كذلك
هل هناك أي مظهر من مظاهر الدين لا يمكن للعبد إخفائها؟! هل يوجد؟
أعتقد أن هاتين الفريضتين و ليس غيرهما هما ما لا يمكن لأي عبد أن يخفيهما
نعود للعلاقة الخاصة
كان الناس فيما مضى يسألون أسئلة من الممكن أن نصفها بأنها أسئلة ذكية
ونعلم جميعا أن الأسئلة الذكية تؤدي إلى اجابات ذكية أيضا
أسئلة تؤدي بهم إلى ما يحتاجون أن يعرفوه حسب العلاقة التي يحددوها هم بينهم و بين الله
أسئلة لا ترهققهم ولا تؤدي بهم إلى شحن كاذب يؤدي بهم إلى عمل زائد عن طاقاتهم يدعونه بعد فترة
أسئلة تناسب قدراتهم
وكانت الإجابة من الرسول صلى الله عليه وسلم على أسئلتهم تتناسب مع كل سائل على حده
كلُ و قدراته . . كلُ و ما يدور في عقله و ما يشغله
وهكذا سار على هذا النهج الخلفاء من بعده و من بعدهم التابعون
ما الفارق بين هذا الجو والجو المنتشر حاليا
هناك حمى استشرت في البلد وهي حمى التدين السطحي
إذا لبس الشخص جلبابا أبيض و أرخى لحيته و حفظ من الأحاديث ما يجعله قادرا على أن يتحدث أمام الناس بما لا يعلمونه أصبح بين الناس لقبه الشيخ فلان؟! أهكذا
أمعقول هذا؟
الناس تتعلم العلم اليوم
وتستذكره غدا
وتفتي بعد غد
وتتطاول على الأئمة الكبار بعد بعد غد
هذا ما نعيشه الآن
لا أجد إلا أن أدعو للتعقل فالعلاقة بين العبد و ربه لا يمكن أن تكون تجارة و شهرة . . فرب إمام مسجد في بلد مغمور اتقى عند الله من مشايخ الفضائيات
و هنا سؤال آخر : هل يتاجر المشايخ بنا؟! نعم هل يتاجرون بنا؟
الشيخ الذي يشعر في نفسه أنه ليس أهلا للفتوى , لماذا يفتي؟
والأدهى و الأمر لماذا يتعصب له الناس؟ أهي حمى الجهل؟
أتحدي أي متلقي يراجع أحاديث أو أقوال أوردها أي خطيب في خطبة بل هو يجادل بلا علم
و حينما تسألو وتقول له العقل و المنطق يقولان . . ينظر إليك شذرا و يقول أبعد كلام الله كلام , أو بعد كلام النبي صلى لله عليه وسلم كلام ؟
يا أخي بأي فهم تفهم كلام النبي أو بأي اسناد
هل نمشي وراء العلماء الذين يحتجون بأضعف الأحاديث؟ هل نترك طلب الرزق لنجادل في ارضاع الكبير و بول النبي و جلد الصحفيين
أي ضياع للوقت هذا
نحن في احتياج لما يبنى عليه عمل يفيد الناس في حياتهم و آخرتهم
حَدَّثَنِي اَبُو خَيْثَمَةَ، زُهَيْرُ بْنُ حَرْبٍ حَدَّثَنَا وَكِيعٌ، عَنْ كَهْمَسٍ، عَنْ عَبْدِ اللَّهِ بْنِ بُرَيْدَةَ، عَنْ يَحْيَى بْنِ يَعْمَرَ، ح وَحَدَّثَنَا عُبَيْدُ اللَّهِ بْنُ مُعَاذٍ الْعَنْبَرِيُّ، - وَهَذَا حَدِيثُهُ - حَدَّثَنَا اَبِي، حَدَّثَنَا كَهْمَسٌ، عَنِ ابْنِ بُرَيْدَةَ، عَنْ يَحْيَى بْنِ يَعْمَرَ، قَالَ كَانَ اَوَّلَ مَنْ قَالَ فِي الْقَدَرِ بِالْبَصْرَةِ مَعْبَدٌ الْجُهَنِيُّ فَانْطَلَقْتُ اَنَا وَحُمَيْدُ بْنُ عَبْدِ الرَّحْمَنِ الْحِمْيَرِيُّ حَاجَّيْنِ اَوْ مُعْتَمِرَيْنِ فَقُلْنَا لَوْ لَقِينَا اَحَدًا مِنْ اَصْحَابِ رَسُولِ اللَّهِ صلى الله عليه وسلم فَسَاَلْنَاهُ عَمَّا يَقُولُ هَؤُلاَءِ فِي الْقَدَرِ فَوُفِّقَ لَنَا عَبْدُ اللَّهِ بْنُ عُمَرَ بْنِ الْخَطَّابِ دَاخِلاً الْمَسْجِدَ فَاكْتَنَفْتُهُ اَنَا وَصَاحِبِي اَحَدُنَا عَنْ يَمِينِهِ وَالاخَرُ عَنْ شِمَالِهِ فَظَنَنْتُ اَنَّ صَاحِبِي سَيَكِلُ الْكَلاَمَ اِلَىَّ فَقُلْتُ اَبَا عَبْدِ الرَّحْمَنِ اِنَّهُ قَدْ ظَهَرَ قِبَلَنَا نَاسٌ يَقْرَءُونَ الْقُرْانَ وَيَتَقَفَّرُونَ الْعِلْمَ - وَذَكَرَ مِنْ شَاْنِهِمْ - وَاَنَّهُمْ يَزْعُمُونَ اَنْ لاَ قَدَرَ وَاَنَّ الاَمْرَ اُنُفٌ ‏.‏ قَالَ فَاِذَا لَقِيتَ اُولَئِكَ فَاَخْبِرْهُمْ اَنِّي بَرِيءٌ مِنْهُمْ وَاَنَّهُمْ بُرَاءُ مِنِّي وَالَّذِي يَحْلِفُ بِهِ عَبْدُ اللَّهِ بْنُ عُمَرَ لَوْ اَنَّ لاَحَدِهِمْ مِثْلَ اُحُدٍ ذَهَبًا فَاَنْفَقَهُ مَا قَبِلَ اللَّهُ مِنْهُ حَتَّى يُؤْمِنَ بِالْقَدَرِ ثُمَّ قَالَ حَدَّثَنِي اَبِي عُمَرُ بْنُ الْخَطَّابِ قَالَ بَيْنَمَا نَحْنُ عِنْدَ رَسُولِ اللَّهِ صلى الله عليه وسلم ذَاتَ يَوْمٍ اِذْ طَلَعَ عَلَيْنَا رَجُلٌ شَدِيدُ بَيَاضِ الثِّيَابِ شَدِيدُ سَوَادِ الشَّعَرِ لاَ يُرَى عَلَيْهِ اَثَرُ السَّفَرِ وَلاَ يَعْرِفُهُ مِنَّا اَحَدٌ حَتَّى جَلَسَ اِلَى النَّبِيِّ صلى الله عليه وسلم فَاَسْنَدَ رُكْبَتَيْهِ اِلَى رُكْبَتَيْهِ وَوَضَعَ كَفَّيْهِ عَلَى فَخِذَيْهِ وَقَالَ يَا مُحَمَّدُ اَخْبِرْنِي عَنِ الاِسْلاَمِ ‏.‏ فَقَالَ رَسُولُ اللَّهِ صلى الله عليه وسلم ‏"‏ الاِسْلاَمُ اَنْ تَشْهَدَ اَنْ لاَ اِلَهَ اِلاَّ اللَّهُ وَاَنَّ مُحَمَّدًا رَسُولُ اللَّهِ وَتُقِيمَ الصَّلاَةَ وَتُؤْتِيَ الزَّكَاةَ وَتَصُومَ رَمَضَانَ وَتَحُجَّ الْبَيْتَ اِنِ اسْتَطَعْتَ اِلَيْهِ سَبِيلاً ‏.‏ قَالَ صَدَقْتَ ‏.‏ قَالَ فَعَجِبْنَا لَهُ يَسْاَلُهُ وَيُصَدِّقُهُ ‏.‏ قَالَ فَاَخْبِرْنِي عَنِ الاِيمَانِ ‏.‏ قَالَ ‏"‏ اَنْ تُؤْمِنَ بِاللَّهِ وَمَلاَئِكَتِهِ وَكُتُبِهِ وَرُسُلِهِ وَالْيَوْمِ الاخِرِ وَتُؤْمِنَ بِالْقَدَرِ خَيْرِهِ وَشَرِّهِ ‏"‏ ‏.‏ قَالَ صَدَقْتَ ‏.‏ قَالَ فَاَخْبِرْنِي عَنِ الاِحْسَانِ ‏.‏ قَالَ ‏"‏ اَنْ تَعْبُدَ اللَّهَ كَاَنَّكَ تَرَاهُ فَاِنْ لَمْ تَكُنْ تَرَاهُ فَاِنَّهُ يَرَاكَ ‏"‏ ‏.‏ قَالَ فَاَخْبِرْنِي عَنِ السَّاعَةِ ‏.‏ قَالَ ‏"‏ مَا الْمَسْئُولُ عَنْهَا بِاَعْلَمَ مِنَ السَّائِلِ ‏"‏ ‏.‏ قَالَ فَاَخْبِرْنِي عَنْ اَمَارَتِهَا ‏.‏ قَالَ ‏"‏ اَنْ تَلِدَ الاَمَةُ رَبَّتَهَا وَاَنْ تَرَى الْحُفَاةَ الْعُرَاةَ الْعَالَةَ رِعَاءَ الشَّاءِ يَتَطَاوَلُونَ فِي الْبُنْيَانِ ‏"‏ ‏.‏ قَالَ ثُمَّ انْطَلَقَ فَلَبِثْتُ مَلِيًّا ثُمَّ قَالَ لِي ‏"‏ يَا عُمَرُ اَتَدْرِي مَنِ السَّائِلُ ‏"‏ ‏.‏ قُلْتُ اللَّهُ وَرَسُولُهُ اَعْلَمُ ‏.‏ قَالَ ‏"‏ فَاِنَّهُ جِبْرِيلُ اَتَاكُمْ يُعَلِّمُكُمْ دِينَكُمْ ‏"‏ ‏.‏
هذا الحديث ورد في صحيح مسلم
وهذه مراتبه
إذا أراد الفرد منا أن يكون متدينا فإنه يستشير قلبه أولا ويقوم بما يستطيع أن يداوم عليه ولا يستمع لإسهال الفتاوى المصاب به الجتمع حاليا
اللهم تب علينا جميعا واغفر لنا اسرافنا في أمرنا و اعف عنا و أحسن خاتمتنا و ارحمنا واغفر ذنوبنا فإنه لا يغفر الذنوب إلا أنت

كل سنه و حضراتكم طيبين

2007-10-09T10:07:00.000+02:00

النهاردة 27 رمضان . . من النهارده هابدأ اكتب حاجات كاملة تقريبا . . يعني هابعد شوية عن الخواطر اللي كتبتها . . الحاجات اللي تستاهل أعلق عليها طبعا هاعلق بس مش كل حاجة . . كمان اللغة ممكن تتغير حبتين . . يعني ممكن تبقى فصيحة . . عربي بجد يعني . . وممكن تفضل زي ما هي . . على حسب . . كمان ممكن اكتب قصه هنا أو مشهدين سينما هناك . . يعني هابدأ اتخصص . . يا ريت أكون موفق . . آمين

هنا بلالاند

2007-10-05T00:44:00.000+02:00

اعلن من هذا المكان ان المدونة سوف تعمل جاهدة على ارساء مباديء بلالاند العظمى . بلالاند تهنئكم بقرب حلول عيد الفطر المبارك . مفيش سكر مفيش زيت مفيش سمن مفيش دم و تستمر قائمة مفيش الى ما بعد السحور . الجو في بلالاند النهاردة كويس يعني ممكن تستنشق الغاز اللي في الجو بلا مضايقة من احد . و مفيش زحمة و الغاز هيجي لكل واحد لحد عنده . كمان الشغل متوفر . تقدر تهرب . . بس المشكلة هتهرب ايه . . مفيش مشكلة الدقيق دلوقتي برخص التراب . . اللي زاد تمنه على فكرة اليومين دول و مبقاش ينفع يتحط عليه مايه عشان يبقى طين . . بلالاند المكان الاوحد اللى ممكن تعيش وتموت فيه دون تعب . . بلالاند هو المكان الاوحد اللي مش هتقدر . . . . . . كل واحد يكمل العبارة دي على زوقه . . هههههههههههههه
كل سنه وانتم على راحتكم

نيو لوك زي ايامكم العسل

2007-10-04T18:30:00.000+02:00

والله الفكرة دي فكرة محترمة الواحد ممكن يبكي على حريته من غير دموعه متبان لحد . الواحد المفروض يكونله موقف و ده موقف متواضع . نسودها في وش اي واحد عنده دم و بيفهم . وده كمان علشان الناس تفهم ان الدنيا مبقاش لونها بمبي. طظ في حضرات الـ 0 0 0

يعني هيحصل إيه؟

2007-09-25T09:27:00.000+02:00

أكاد أسقط من الضحك على هذا الشعب الجبان . . هو يريد أن يعيش ولا يريد أن يتعب ليحقق هذا . . يريد الحرية . . و يريد من يعطيه هذه الحرية . . يا بهايم هي الحداية بتحدف كتاكيت . . ههههههه . . إيه الهبل ده . . كنت في الفصل امبارح و قلت إيه الفرق بين الهبل و الحمق . . أنا نفسي معرفش . . شفت هبل أكتر من كده . .على أي حال البنات اقتنعوا بالهبل اللي قلته . . الحمد لله . . كده يعني
و ساعات أكاد اتمزق من الحزن . . لحالة العجز و الخوف التي يعيشها الناس . . اللي أكتر من كده حالات التغييب اللي احنا ماشيين فيها . . الناس مغيبة في رمضان و فوازيرة و مسلسلاته . . يعني هانلاقيها منين ولا منين . . كده يعني
وبتبسط جدا لما أسمع أغنيه تحركني . . الإنسان ده مخلوق أهبل . . من غير يمين أهبل . . و يمكن يكون مجنون . . كمان ببقى طاير من الفرحة لما أسمع صوت خطيبتي . . ولما أشوفها قدامي بيبقى عيد
المهم الواحد يديها صرمه و يعمل اللي شايفه صح
يا رب . . انت بس اللي تقدر وغير عاجز . . غيرك عاجز . . غيرك عاجز

شعب بزرميط

2007-09-23T09:15:00.000+02:00

ايوه بزرميط . . لا هو عارف مصلحته فين . . و إن عرف . . مش بيعرف يجيبها . . ولا بيعرف يمتع نفسه متع حقيقية . . و في الدين عامل زي اللي رقصوا على السلم . . علاقاتنا مشوهة . . بنمثل اننا عايشين . . و النتيجة واضحة . . اننا بنعيش اسوأ أيام ممكن يعيش فيها بشر . . احنا السبب قبل أي حد . . ممكن يكون في ناس تانية مسؤلة . . بس ييجو بعدنا . . سلامي لأي واحد حاسس إنه عايش

هموم

2007-09-22T22:19:00.001+02:00

اي واحد عنده دم في بلد اسمها فقرستان و مرضستان و جوعستان و هبلستان و استعباطستان لازم يبقى مهموم . . مهموم لما يلاقي نفسه مش قادر . . مش كادر . . مش ممكن يعمل او يتكلم على اللي ممكن يعمله او يفكر يعمل حاجه. . الواحد بطل يستمتع . . حسبي الله و نعم الوكيل . . الواحد باين عليه لازم يبقى بهيم عشان يعيش . . و حتى لو بقى بهيم مش هيعيش . . الله المستعان . . البلد زفتستان دي مش هتفضل على طول كده . . لازم هاتتغير . . وربنا يسهل . . غني يا كلثوم غني . . طظ فينا و فيكي و فيهم

الكلام أخرس

2007-09-14T14:50:00.000+02:00

حسبي الله و نعم الوكيل

بُكره اول يوم رمضان

2007-09-12T21:41:00.000+02:00

الناس كلها فرحانه. . ليه؟ . . علشان رمضان بكره . . اهلا وسهلا . . ورمضان جاي السنادي ليه؟ . . الله . . انت ايه يا أخي . . حد يكلم ضيوفه كده؟ . . انا يا أخي . . ربنا يهديك . .أمين . . انت لازم تصوم . . وتصلي . . الصوم من غير صلاه ماينفعش . . وكمان لازم تقرا قران كل يوم على الاقل جزء . . وماتضيعش وقتك على التلفزيون و المسلسلات اللي هاتسلسلك في نار جهنم . . وتغض بصرك . . يعني مش كل ما وحده تعدي قدامك تفرز اهلها من فوق لتحت . . ولا من تحت لفوق يا بارد . . استغفر الله العظيم . . اهو انتو كده دايما . . المهم . . كمان تعطف على اللي انت متاكد انه يحتاج مساعده . . خلي بالك في ناس بتمثل . . يعني اللي صحيح يستاهلو دول معروفين . . يجي 90 % من سكان مصر . . متتخضش اللي تقدر عليه . . كمان لازم تكتب صفحه جديده مع ربنا وكانك اتولدت النهارده . . اما الحاجات القديمة ربنا هايحلهالك ماتقلقش . . وبعدين لو كنت استفدت ادعيلي

كل سنه وانت طيبه يا مصر

2007-09-11T22:32:00.000+02:00

والله يا مصر الواحد مش عارف يقولك ايه . . انت اكتر حاجه بتصعب عليا في الدنيا . . الناس مش عارفه تقدرك ولا انت كمان معبره حد . . ومش عارف انت بتحبي مين . . عامله زي البنت البكر اللي مش لاقيه عريس . . ويا ريت حد عاجبها . . وعنست البنت . . وخطابها بقيو قليلين . . وهي زي ماهي بس بتشوف مصلحتها برضه . . وفي ناس بتشوف طلباتها وواخدا خيرها . . وشك كرمش يا مصر . . ومع ذلك بحبك . . الهبل اللي بيقولو مصر امنا هما السبب انها عجزت بدري . . مصر كانت شابه فتيه . . ميعجبهاش في البر كله الا المصري . . دلوقتي وبعد مالوش كرمش . . الله اعلم . . مين هاعيطف عليها ويجيب حاجة رمضان . . وهاتقدري تصومي يا مصر . . سؤال يضحك قد مايبكي . . وهي لاقيه تاكل اصلا . . طيب ومين ده اللي يلاقيكي في حالتك ديه وما يبكيش . . ياللا حسن الختام . . بس يا مصر انت هاتموتي وتسيبينا لمين . . هاتسيبينا للي مش مصري . . يبهدلنا . . كنا ليكي و ما رضيتي بـحد . . ودلوقتي . . وبعد الوش ماكرمش جايه يا مصر تقولي الحقوني . . واحنا كان مين لحقنا لما بكينا عند اقدامك وانت باصا لناس منيش عارف انت واخده منهم ايه . . احنا اصلا ولاد كلب اننا مشفناش مصلحتنا احنا كمان . . احنا شيفينك غالية وانت ولا انت هنا . . الوش كرمش . . انت حاسه اني شمتان؟ . . ابكي؟ ولا اضحك .. والله واحد . . ضحك زي البكى . . يمكن يموِّت . . انت حاسة انك لوحدك . . يا مصر احنا عشقنا ترابك . . وانت سهرانه في شارع الهرم . . احنا بنموت واحنا بنردد في اسمك . . والكاس في ايدك وبتقولي للي يسوي واللي ما يسوى في صحتك . . واحنا صحتنا راحت هدر . .الوش كرمش . . وانت قاعدة بعد خيرك مراح وطار في جيوب اللي يسوي واللي ما يسوى من البشر . . انت السبب . . اوعي تقولي اننا احنا اللي نسينا حقك علينا . . انت السبب .. انت اللي سبتينا نموت من غير مانحضنك ولا حضن واحد من غير ما نلحق نجيب الولد . . والوش كرمش . . طز في اللي هيزعل و طز فينا كمان . . اصل احنا مشفناش مصلحة نعملها ونكبر دماغنا منك ومن وجع القلب اللي طايلنا في حبك . . جاتنا القرف واحنا مشاليل ومعرفناش نشيلك من دماغنا . . يعني انت بتموتي واحنا قبلك متنا بس انت بتموتي بغلطك واحنا متنا بحبك

انا بحب

2007-09-10T23:38:00.000+02:00

المشكله اني مش عايز اعترف . . اعترف يابني وريحنا . . بتحب و لا لا . . بحب و الله بحب . . بحبها يا سيدي . . ازاي ؟ مش عارف . . اهو ده اللي حصل . . وده ماثر فيك ازاي . . مبهدلني يا سيدي . . مش عارف اعمل حاجة الا اما افكر في اللي بحبها . . طيب انت مش قلت انك خاطب ؟ . . ماهو انا بحب خطيبتي. . طيب يعني مفيش مشكلة؟ انت اهبل؟ . . احنا هانلبخ؟ لا بس ايه المشكله انك تحب خطيبتك؟ لا مفيش . . حد قال ان فيه مشكل؟ لا . . طيب. . حب يا سيدي على راحتك. . طبعا على راحتي امال على راحتك انت. . انت بعقلك. . مش بقولك اهبل . . ليه؟ انا بقولك بحبها و انت تقوللي بعقلك . . انت اكيد عبيط. . .والله خسارة الوقت اللي قعدت اتكلم معاك فيه

يا سلام

2007-09-09T19:01:00.000+02:00

كله تمام يا عم و مدير المدرسة راجع احسن من الاول بس الطالب اللي هيشوف نفسه هيروح يسلملي على جوزك يا اسماعين بيه. . يالله ربنا يسهل . . اللي عايز حاجه يطلبها من ربنا

Great news!

2007-09-04T21:05:00.000+03:00

Somethimg very very strange is going on in Egypt. What is that? Nobody knows. The joke is over. Why I post in English today is not known either. We can never tell what's going on in Egypt nowadays. WE ARE WAITING!!?

ليه الناس مش طايقه نفسها

2007-08-30T00:36:00.000+03:00

ان شالله اعدمك لو كنت اعرف و مخبي عليك . . يعني الموضوع ده عايز مؤتمر قمه . . ونِحضره كلنا . . واللي مش هايجي هاناخده غياب . . اه . . انضباط بأه . . وبعدين يجي حضرة الناظر يسال البشرية الموجودة . . مين السافل ابن السافل اللي مش طايق نفسه . . هاتبص تلاقي الكل . . بلا استثناء . . وفي نفس واحد . . مفيش حد يا بيه . . بس يلف الناظر بضهره وتبدأ الشتيمه . . يابن . . . . . . . . . معلهش الشتايم دي مش هاعرف اشرحها للاطفال الصغيرين . . المهم . . الناس اليومين دول داخلين نفق . . امتى نطلع منه . . الله اعلم

خلي بالك

2007-08-27T03:12:00.000+03:00

السنة اللي عدت كنت بسمع عمرو خالد و حابب اللي بيعمله . . مش هاقول السنادي مش بسمعه . . بس بخلي بالي . . اصل العالم ده ومن غير يمين مش بيفكر فينا ولا احنا على باله من الاساس . . يعني استفدنا . . غرنا في ستين داهية . . ولا في دماغه من اصله . . المهم خلي بالك . . هاتلاقي فتاوي بترخ عليك من كل ناحية . . بيقولوها من كل حدب و صوب . . وتلاقي ناس بتشحت عليك وكانك انت الجشع الطماع اللي معاك فلوس و قال ايه مش عايز تدي الفقرا . . قال ايه انت معندكش دم الناس حواليك تعبانه وانت يا بارد مش بتساعدهم . . طيب اذا كان الهبل دول مش عارفين ان الناس منهم 200% تعبانيين . . احنا نصدقهم ازاي . . احنا مش عارفين نفسنا ولا ايه . . يعني يا عم الحاج انت اكتر واحد تقدر تحس اذا انت مقصر في حق ربنا و بعدين نفسك و بعدين مراتك وعيالك . . وبعدين . . حيلك حيلك . . طظ في اي حد بعد كده . . لو قدرت تعمل دول ابقى تعالى العب حاوريني يا كيكه على قبري . . من الاخر خلي بالك من الناس اللي بتتكلم وهي قاعدة في مكان مكيف و المايه قدام منهم والمخرج بيسال ميتين ايمان امهم . . ابدا يا فندم . . ابدا يا روحي بس حسبي الله ونعم الوكيل في اي حد يتاجر بهموم الناس . . يا رب بلغنا رمضان وانت راضي عننا . . امين

دعاء

2007-08-20T17:21:00.000+03:00

يا جماعة انا جاي على بالي ادعي
يا رب . . انت اكيد عارف اللي انا عايزه . . طيب يعني انت عالم بحالي و غني عن سؤالي . . بس يا رب انا ماليش حد . . يعني لا مال و لا عزب و لا اطيان ولا حاجة . . غير الستر يا رب . . الستر مش نعمة قليلة . . اللهم دمها علينا و احفظها من الزوال يا رب . . بس
انا طمعان يا رب في اللي عندك . . طمعان تكرمني و تنجحني في شغلي و ابقي احسن واحد فيه . . كمان طمعان تكرمني مع خطيبتي و توفقني اسعدها و نعيش ايام ترضيك واحنا سعدا . . كمان ربنا عالم باللي عايز اطلبه منه اكتر حاجة . . اكرمنا يا رب . . يااااااااارب . . امين

يا عم خليها على الله

2007-08-18T20:02:00.000+03:00

و الله الواحد محتار في البلد العسل دي . . يعني فساد تلاقي . . اصلاح ممكن . . ناس محترمة كتير . . ناس ولاد كلب على افا من يشيل . . تقوى . . اهي دي موجوده كمان . . قلة ادب . . الصنف متوفر . . يعني مفيش خط يميز البلد . . البلد سمك لبن تمر هندي . . طيب انا وسط ده كله . . اعمل ايه . . تاخدها نصيحة؟! ماتعملش حاجة . . اعمل اللي عليك في شغلك الخاص او العام . . ولك رزق وماتخافش عليه . . وخليها على الله

علمني . . علمني

2007-08-08T06:58:00.000+03:00

كلما نظرت فيما قدمت و ما قدم الاخرون . . اشعر بعدم الثقة . . فيما قدمت و فيما قدم الاخرون . .فما قدمت يخدمني في الاساس و ما قدم الاخرون يخدم مصالحهم . . حتى العيوب . . عيوب الاخرين نراها جلية واضحة . . و عيوبنا وان كانت هي نفس العيوب . . تتعامى عنها العيون . . اي زيف نعيشه . . واي تيه . . و علمني العوم و النبي يا احمد

بَحب في غرامك

2007-07-29T20:19:00.000+03:00

بعد نهار كله لهيب و عذاب و تنكيل بالعباد . . تمكنت من اقتناص لحظات تحت الدش الملكي في منزلنا العتيد . . على فكرة هو مش عتيد قوي يعني . . المهم . . المياه كانت تتدفق على جسدي المشتاق لجو معتدل . . صنعت المياه فارقا بِّينا . . كنت منتشيا سعيدا . . اكاد اطير من الفرح . . فمن ساعات طوال . . بدات انتعش . . و وجدتني اغني و انا امشط شعري و شاربي و لحيتي . . وجدتني اقول . . بحب في غرامك ألاقي كلامك محدد قصادي . . كلام مش بيحود يا ابيض يا اسود لكن مش رمادي . . وبعدها فكرت اكيد دي مش واحده ست . . دا راجل متنكر في صورة لطيفة . . لطيفة جدا . . و واحد يستغرب . . لحيتك و كمان بتغني . . غصب عني . . يالله . . كمان فكرت في الغلابة اللي مش لاقيين المياه يشربو . . لكن اعمل ايه . . يارب فرج الكروب وانصر المغلوب . . امين

وها انا اغني . . ظلموه

اكتر حاجة ممكن تاخد وقت

2007-07-29T06:43:00.000+03:00

الناس ممكن تحس ان اللي بياخد الوقت و يسرقه منهم هو التليفزيون او الدش او حتى الكلام في الموبايل . . بس الحقيقة هي ان الشخص اللي معندوش هدف واضح يحاول يحققه هو اللي وقته ضايع حتي لو بيعمل فيه حاجة مفيدة

طبعا في ناس هاتستغرب الموضوع ده قوي بس دي الحقيقة نفترض انك كنت واحد كويس , او واحد كويسة , وبتعمل كل حاجة كويسة والامور ماشية و الحمد لله

بس كده؟ الموضوع لازم يكونله اتجاه . نقطة ينتهي عندها الكلام . يعني لما بتخرج سعادتك من البيت بتبقى حضرتك عارف انت رايح فين؟ طيب لما هو ايوه مستغرب ليه تمشي في حياتك وانت عارف رايح فين

الناس علشان تبدا تستثمر وقتها لازم تكون عارفه الاول هي عايزه ايه و عايزه توصل فين

طيب . . دلوقتي كل واحد يكتب هو عايز ايه

نِعَم . . بس اللي يقول الحمد لله

2007-07-27T05:50:00.000+03:00

الاول عايز انبه ان المكان ده مش بتاع حد . . يعني انا حر . . اكتب كويس او اهيس . . انا حر

طيب . . واللي مش عاجبه . . ياخد بعضه . . ويحل عننا

نرجع للنعم . . تقدر تعد النعم اللي ربنا ادهالك؟

بجد و اللهِ . . طيب حاول . . هات ورقة و قلم . . واكتب

كتبت كام نعمة . . ماتنساش امك . . دي اهم نعمة

انا مش عايز اتكلم على دول . . انا عايز اتكلم عن الفراغ . . ايوه وقت الفراغ يعني . . اللي سيادتك بتبقى مش عارف تعمل فيه ايه

النبي صلى الله عليه و سلم قال : " نعمتان مغبون فيهما كثير . . الصحة و الفراغ " او كما قال صلى الله عليه وسلم

مغبون؟ . . اه . . معناها مظلوم

يعني مش عارفين قيمة وقت الفراغ ده

لغاية ماكتب تاني . . هانتكلم على اهم 7 حاجات بتسرق وقتك

متنساش تحمد ربنا على اللي انت فيه

انت زعلان ؟ ؟ ! واللهِ

2007-07-26T18:53:00.000+03:00

لا بجد انت زعلان . . ؟

واحد هيقول ايوه زعلان والله زعلان . . . بس يا حبيبي . . . اتفلق . . اخبط راسك في اتخن حيطة في بيتكم (دا اذا كان لكم بيت) بالله يا شيخ ماتقرفناش . . انت فاكر نفسك مين يا حبيبي . . مصيبة لتكون فاكر نفسك مهم لا سمح الله . . ولا تكون فاكر ان في حد ها يسمعك . . . لا دانت طيب قوي . . انت مش مهم . . تاني ؟ مش مهم . . استريحت

واحد تاني هيقول . . زعلان ؟! ليه ؟ ياراجل . . هو في حاجة تزعل . .؟؟!! . . ابدا

بكل ثقة وتجرد وحياد . . سعادتك معندكش دم . . ولا تعاطف . . ولا انسانيه . . ويستحسن انك تغور من وش اي واحد عنده دم و هاتحرقهوله ببرودك. . ماشي

نصيحة . . روح اتعالج . . ماشي

واحد تالت بقى ممكن يقول . . و الله انا مش عارف انا زعلان ولا لا . . ؟؟! لا يا شيخ

مش عارف زعلان ولا لا . . الطم يا واد . . تعليم ايه ده . . اللي يخلي الناس مغيبه و مفيش في بالها غير الكورة و الاغاني و الجنس . . بس

طيب بالله اقرا يا حبيبي . . واتفرج بس على الدنيا اللي بجد مش التاليف الاهبل اللي بياكلو بيه علي قفانا عيش . . عيش؟! بس . . لا دول بياكلو جاتوه على قفانا برضه

بس كفايه علشان انا زعلت